Warning: fread(): Length parameter must be greater than 0 in /home/kaladze/public_html/system/library/cache.php on line 27 კახეთის გზატკეცილზე მიმდინარე სარეაბილიტაციო სამუშაოები
22 აგვისტო, 2018

კახეთის გზატკეცილზე მიმდინარე სარეაბილიტაციო სამუშაოები

ინფრასტრუქტურის განვითარების საქალაქო სამსახურმა კახეთის გზატკეცილის მარჯვენა სათადარიგო ზოლის რეაბილიტაცია დაიწყო. მიმდინარე სამუშაოებს თბილისის მერი კახა კალაძე, საკრებულოს თავმჯდომარე გიორგი ტყემალაძესთან ერთად, ადგილზე გაეცნო. ამ ეტაპზე სათადარიგო ზოლის საექსკავაციო სამუშაოები მიმდინარეობს. პროექტით გათვალისწინებულია 9 კმ-მდე სიგრძის მონაკვეთის სრული რეაბილიტაცია, რაც გულისხმობს ახალი ბორდიურის, ტროტუარების, სანიაღვრე ქსელისა და ორზოლიანი საავტომობილო სავალი ნაწილის მოწყობას.

თბილისის მერის კახა კალაძის განცხადებით, მომავალი წლიდან უკვე კახეთის გზატკეცილის ძირითადი საავტომობილო სავალი ზოლის სრული რეაბილიტაცია განხორციელდება, მოწესრიგდება გზაგამყოფი ზოლი, განათების ბოძები შეიცვლება და ახალი, თანამედროვე, ევროპული ტიპის განათებები დამონტაჟდება.

„მნიშვნელოვანია, რომ სადაც ვიწყებთ სამუშაოებს, სრულად მოწესრიგდეს ყველაფერი და უკვე დასრულებულზე აღარ მოგვიწიოს ხელახლა გადათხრა. შესაბამისად, 9-კილომეტრიანი მონაკვეთი სრულად მოწესრიგდება და მეორე ეტაპი წლის ბოლომდე დასრულდება. მესამე ეტაპი , ეს არის უკვე ცენტრალური მაგისტრალის რეაბილიტაცია, რომელსაც მომავალი წლიდან დავიწყებთ. ეს გზა სტრატეგიული მნიშვნელობისაა. ჩვენს ქვეყანაში ჩამოსული ტურისტები, ძირითადად, ამ გზით სარგებლობენ და აქ არსებული მდგომარეობა არასახარბიელო იყო. შესაბამისად, ამ გზის გაკეთება არის მთავარი პრიორიტეტი. გზატკეცილი მოწესრიგდება სრულად, თავისი განათებებითა და გზაგამყოფით“,- განაცხადა კახა კალაძემ.

ამასთან, მიმდინარე წლის მარტიდან დაიწყო და ინტენსიურად მიმდინარეობს მარცხენა სათადარიგო ზოლის სარეაბილიტაციო სამუშაოები.

პროექტის ფარგლებში, კომპანია „ჯორჯიან უოთერ ენდ ფაუერის“ მიერ აღნიშნულ ლოკაციაზე წყლისა და წყალარინების ქსელებიც შეიცვლება.

კახეთის გზატკეცილზე მარჯვენა სათადარიგო ზოლზე მიმდინარე სამუშაოებისთვის დედაქალაქის ბიუჯეტიდან 10,4 მილიონი ლარი დაიხარჯება. სარეაბილიტაციო სამუშაოებს თბილისის მერიის ტენდერში გამარჯვებული კომპანია ,,ბლექს სი გრუპი“ აწარმოებს.

კახეთის გზატკეცილზე მიმდინარე სარეაბილიტაციო სამუშაოებს თბილისის მერთან ერთად, მერის მოადგილე ირაკლი ბენდელიანი, ინფრასტრუქტურის განვითარების საქალაქო სამსახურის უფროსი გაგი ბუაძე და სამგორის რაიონის გამგებელი კახა გულედანი გაეცნენ.

მსგავსი სიახლეები

Warning: Unknown: write failed: Disk quota exceeded (122) in Unknown on line 0Warning: Unknown: Failed to write session data (files). Please verify that the current setting of session.save_path is correct (/var/cpanel/php/sessions/ea-php72) in Unknown on line 0